kavingar jawaharlal kavithaigal: April 2018

Thursday, April 12, 2018

மறந்தா போனார் ?

காற்றினி லாடி, உள்ளக்

களிப்பதை நாடிக், காதற்

பேற்றினில் மூழ்கிக், கொம்பைப்

பிணைத்துமே பின்னி வாழும்

போற்றிடு தன்மை யுள்ள

பூநிறை மல்லி கையே !

நேற்றெனை அணைத்தா ரின்று

நினைப்பதை மறந்தா போனார் ?

சேர்த்தெனை யணைத்துக் கன்னம்

சிவந்திட ஈயும் போது

பார்த்ததைக் கீச்கீச் சென்று

பழித்துமே பறந்து பேட்டைச்

சேர்த்தெமைச் சுற்றி வந்து

திரிந்தபூஞ் சிட்டே ! நேற்றுக்

கோர்த்தகை பிணைத்தா ரிந்தக்

குமரியை மறந்தா போனார் ?

இடையினைத் தடவி அய்யோ

எங்கேயுன் இடையென் றென்றன்

இடையினைத் தேடு வார்போல்

என்னவோ செய்யும் போழ்தில்

தடைசெய வந்தாய் போலச்

சரக்கென முறைத்துச் சோலை

இடையினிற் பாய்ந்த மானே !

எனையவர் மறந்தா போனார் ?

இடைவெளி குறுகி நாங்கள்

இருவரொன் றாகி எங்கள்

இடையினில் எதுவும் போக

இடமிலா திருக்க அந்த

இடைவெளி தனிலும் மிக்க

இடரொடு நுழைந்த காற்றே !

இடையிலே நாளொன் றுக்குள்

இதையவர் மறந்தா போனார்?

27-03-1960

kavingar jawaharlal kavithaigal