விந்தைத் தீ!

தொட்டாற் சுடுவது தீயெனும் உண்மையைத்

  தாரணி முழுதுமே அறிந்திருக்கும்;-இது

விட்டாற் சுடுது; தொட்டாற் குளிருது;

  மேதினி தனிலொரு விந்தைத்தீ!

பார்வைப் பொறியினில் பற்றிடு தீயிது

  பருவ வயசினில் எரியும்தீ1-அவள்

பார்வை நீரினில் அணையும் தீயிது

  பசக்கென நெஞ்சைக் கசக்கும்தீ!

நினைவில் ராகம் இசைத்திடு தீயிது

  நெஞ்சினிற் குளிக்கும் இன்பத்தீ!-இன்பக்

கனவினை நனவாய் மாற்றியே கண்ணுள்

  காட்சிகள் விரிக்குமோர் உணர்வுத்தீ!

படுக்கையை முள்ளென மாற்றும் தீயிது

  பகலிர வெல்லாம் மறக்கும்தீ!-ஒரு

நொடியினை யுகமாய் மாற்றி வதைக்கும்

  நுட்பத் தீயிது கொடுமைத்தீ!

வீரமும் சருகாய் எரிக்கும் தீயிது

  வீரனாய்க் கோழையை ஆக்கும்தீ!-எந்தச்

சாரமு மில்லாச் சக்கையைக் கூடவோர்

  சரித்திர மாக்கும் மாயத்தீ!

உணர்வு நரம்பினில் எரியும் தீயிது

  உவகைப் பண்ணினை இசைக்கும்தீ!-காதல்

உணர்வு கலந்தவள் பார்த்திடு பார்வையில்

  உள்ளம் நனைத்திடும் புதுமைத்தீ!

அவள்பிரி வதனிற் பொசுக்கிடு தீயிது

  ஆசைக் கனவாய் எரியும்தீ!-வந்தே

அவள்மடி வீழ்ந்தே அணைக்கும் அணைப்பினில்

  அணையும் தீயுளம் அணைக்கும்தீ!

பிரிவினாற் சுட்டிடு மவளே வந்தெனைப்

  பாம்பெனப் பின்னி யணைக்கட்டும்!-அந்தப்

பரிவுத் தழுவலால் எரியும் தீயினைப்

  பக்குவ மாக அணைக்கட்டும்!