with kannadasan

 [ 1972 ல் ஆ.தெக்கூர் மேனிலைப் பள்ளியில் 

            கவிஞர் கண்ணதாசன் தலைமையில் 

              நடந்த கவியரங்கம்.}

                 திறமை

    

தலைப்பிங்கே சரியில்லை என்று சொல்லித்

   தாவிக்கொண் டென்மனைவி அருகில் வந்தாள்;

தலைப்புனக்கும் பிடிக்கலையா? எஞ்சி நின்ற

   தலைப்பிதுதான்; என்னசெய்ய? என்றேன். உங்கள்

தலைவிதியா? யார்யாரோ கழித்துப் போட்ட

   தலைப்பினைஏன் எடுக்கவேண்டும்? என்று சேலைத்

தலைப்பிலுள்ள கிழிசலையே காட்டி நின்றாள்;

   சரிசரியிச் சங்கதியே வேறு; வேறு

கவியரங்கத் தலைப்பெனக்குத் 'திறமை' என்றேன்;

   கடகடெனச் சிரித்திட்டுச் 'சரிதான் இந்தப்

புவியினிலே இல்லாதார்க் கீதல் தானே

   புகழ்மிக்க கொடையாகும்; பொருத்தம்' என்று

செவியினிலே அறைந்தாற்போல் சொன்னாள்; சொன்ன

   சொல்லினிலும் தவறில்லை; திறமை இந்தப்

புவியினிலே எனைத்தவிர மற்ற எல்லாப்

   பொருள்விற்கும் வியாபாரி யிடத்து முண்டு.

கத்திரிக்காய் வாங்கிவரப் போனால் அந்தக்

   கடைக்காரன் என்னிடத்தே அன்பு கொண்டு

கத்திரிக்காய் நான்பொறுக்கித் தருவே னென்று

   கனியாகத் தந்திடுவான்; வீட்டில் சேர்த்தால்

கத்திடுவாள்; நறுக்கிடுவாள்; புழுவாய்க் கொட்டும்;

   'கடையினிலே கத்திரிக்காய் வாங்கக் கூடக்

கற்றிருக்க வில்லையிங்கே திறமை பற்றிக்

   கவிபாடிக் கிழியுமெனப் பாடித் தீர்த்தாள்;

நானென்ன செய்திடுவேன்? திறமை இன்று

   நாட்டினிலே பொதுவுடைமை ஆகிப் போச்சு;

தேனென்ற பேச்சாலே மயக்கி நம்மைத்

   தெளிவாக ஏமாற்றும் திறமை இந்த

மாநிலத்தில் எங்குமுண்டு; நமக்கே அந்த

   மாயத்தில் ஏமாறாத் திறமை வேண்டும்;

மாநிலத்தில் இதுமட்டுந் தானா? எல்லா

   வகையினிலும் திறமையிங்கே வெளிச்சம் போடும்.

அரசியலில் இத்திறமை கொண்டோர் நாட்டை

   ஆளுகின்ற பொறுப்பேற்பார்; நம்மை நோக்கி

வரவிலையே காற்றெனவே ஏங்கி நிற்போர்

   வாழ்க்கையெலாம் ஏக்கத்தில் கழிப்பார்; ஐந்து

வருடத்திற் கொருமுறையோர் புயல டிக்கும்;

   வீதிதொறும் பெருமுழக்காய் இடியி டிக்கும்;

சிறுதூற்றல் சில்லரையாய்க் குடிசைப் பக்கம்

   சிந்திவரும்; தென்றலெனப் பேச்சு வீசும்;

            ( இதெல்லாம் எதற்காக )

வாக்குண்டாம்; மணமுண்டாம்; பெரிய வர்கள்

   வரவுண்டாம்; உரையுண்டாம்; குடிசைக் கெல்லாம்

வாக்கில்லை யெனிலிங்கோ மணமு மில்லை;

   வரவுமில்லை; பைத்தியமா? பயனே யின்றி

வாக்கில்லா மக்களுடன் பேசப்; பின்னர்

   வருகின்ற தேர்தலுமே முடிந்து போனால்

வாக்களித்த பெரியோர்கள் இறைவ னாவார்;

   வாக்காளர் தவங்கிடக்கும் அடியா ராவார்.

             உயர்ந்த திறமை

நம்முன்னோர் திறமையிலே குறைந்தா போனார்?

   நானிலத்தில் நாகரிகம் பரவா முன்பே

நம்முன்னோர் கலைகளிலே நிமிர்ந்து நின்றார்;

   நாலுவகைத் திறமையிலும் உயர்ந்து நின்றார்;

நம்முன்னோர் காலம்பொற் காலம்; எல்லா

   நுண்கலையும் ஈடில்லா தொளிர்ந்த காலம்;

அம்முன்னோர் பெருமையினை அளந்து காட்டி

   அளப்பரிய ஆண்டுகளாய்க் கலைகள் நிற்கும்.

வானெட்டிப் பார்க்கின்ற கோபு ரத்தின்

   வகையெட்டிப் பார்த்திட்டால் வியப்பு மீறும்;

ஏனெட்டி உலகாளும் வாய்ப்பை இந்த

   இனமெட்டிப் பெறவில்லை? என்ற கேள்வி

தானெட்டி மனதிலெழும்; இலக்கி யத்தின்

   திறமெட்டிச் சுவைத்தாலும் அதுவே தோன்றும்;

ஏனெட்டி உயரவில்லை? காலத் தோடே

   இனமெட்டி வளரவில்லை; அவ்வ ளவ்வே.

திறமைகளோ பலவிதமாம்; தீயைப் போலச்

   செய்வதற்கும் அழிப்பதற்கும் துணையாய் நிற்கும்

திறமையினை நாம்வளர்க்க வேண்டும்; அந்தத்

   திறமையினால் பிறரழித்துத் தானே வாழும்

திறமிங்கே தோன்றாமல் இருக்க வேண்டும்;

   தினந்தோறும் உரையாடும் போதும் பேசி

உறவாடுங் காலத்தும் நம்மைக் காக்கும்

   ஒப்பரிய திறமையுரு வாக வேண்டும்.